اليوم راح أتكلم عن الخطة الي المفترض تكون عند الباحث عن العمل أول ما يتخرج من الجامعة، خصوصا في أول 6 شهور بعد التخرج، من ناحية وضع الأهداف عند البحث عن فرصة
وعند تحديد الهدف، وضعت 4 معايير رئيسية تهم الباحث عن وظيفة وهي:
✅ الإرتباط بالتخصص
✅ سمعة وحجم الشركة
✅ المدينة
✅ القطاع المرغوب
1⃣ الإرتباط بالتخصص:
وهذا المعيار يهمك من ناحيتين، الأول أن تكون الوظيفة الي تشتغل فيها بمجال تخصصك الجامعي بحيث التميز في المهام المطلوبة منك بيكون أسهلك بحكم المعرفة الي اكتسبتها بالجامعة، الثاني أن يكون مجال الشركة في عمق تخصصك، يعني اذا متخصص بالتسويق فأشتغل بشركة تسويق!
واذا كنت متخصص بالموارد البشرية فاشتغل بشركة توظيف، ليش؟ لأنك راح تكون في القسم الأهم بالشركة، القسم الي يدخل فلوس للشركة، يعني المحرك الرئيسي للشركة لذلك قيمتك عندهم وأهميتك أعلى من كونك موظف أتش أر في شركة تسويق، لان الاتش أر يعتبر تكاليف على الشركة بينما المسوق مصدر ربح لها
2⃣ سمعة وحجم الشركة:
إسم الشركة يهم في السيرة الذاتية، يختلف لو انك اشتغلت بشركة عالمية معروفة في كل مكان بأنها ممتازه، وبين انك شغال في شركة غير معروفة. سمعة الشركة وقيمة البراند اذا زاد فهو يرفع من سمعة موظفيها، لذلك حاول ترتبط بالشركات الي ترفعك
3⃣ المدينة:
في كثير من الباحثين عن وظائف عنده ارتباطات عائلية أو مسؤوليات في المدينة الي عايش فيها، خصوصا البنات لذلك حطيتها ضمن المعايير بالرغم من إن المبدأ الأساسي هو أنك تتبع رزقك مكان ما يكون حتى لو في الصين. لكن حياتنا الاجتماعية في حالات تحتم علينا ننطق في مكاننا ولا نتحرك
4⃣ القطاع المرغوب:
اختيار القطاع مهم جدا جدا، قد تكون متخصص في التسويق لكن عندك شغف للسفر والسياحه، تخيل نفسك تشتغل في تخصصك بقطاع يعجبك وانت اصلا تفهم فيه بحكم هوايتك! هذا راح يضمن شغفك بعملك وسعادتك فيه لذلك هذا المعيار مهم جدا رغم ان البعض ما يعيره الاهتمام المطلوب
طيب الأن نرجع لخطة الباحث عن وظيفة في أول 6 أشهر.
الشهر 1 مرحلة الطموح: الهدف هو الحصول على وظيفة بدوام كامل في نفس المدينة بمجال التخصص لدى شركة كبيرة معروفة محليا أو عالميا في القطاع المرغوب المفترض ما تنطبق هذه الشروط الا على 5-10 شركات بالكثير، ركز وخذ راحتك في التقديم
ابحث عن الشركات واقرأ فيها أكثر وقدم عليها وأمشي معاها في الاجراءات، مثل هذي الشركات الاجراء غالبا يطول لذلك ابدا فيها وخليك متابعها واذا خلال شهر ما وصلت لعرض وظيفي، تابع معاهم لكن كمل الخطة الي عندك ولا توقف. روح للمرحلة الثانيه يا مودير
الشهر 2 مرحلة تخفيف الطموح: الهدف الحصول على وظيفة بدوام كامل في نفس المدينة بمجال التخصص لدى شركة معروفة في القطاع المرغوب وفيها اتنازلنا عن كون الشركة عالمية لكن صرنا ندور على شركات محلية كبيرة ومعروفة وهنا تزيد اللسته وتصير الشركات المستهدفة عددها أكبر.
الشهر 3 مرحلة التنازل الجغرافي: الهدف الحصول على وظيفة بدوام كامل في مدينة قريبة بمجال التخصص لدى شركة معروفة في القطاع المرغوب وهنا اتنازلنا عن المدينة وقلنا نشوف في المدن المجاورة او المدن الكبيرة الأخرى، ما اتنازلنا عن التخصص ولا عن القطاع ولا عن الشركة لأنها أهم من المدينة
اوكي! تنازلت عن المدينة لكن للحين ما جاك شي! وش السوات صار لك 4 شهور!
الشهر 4 مرحلة التنازل عن القطاع: الهدف الحصول على وظيفة بدوام كامل في مدينة قريبة بمجال التخصص لدى شركة معروفة في أي قطاع صحيح راح تفقد الحماس في عملك لكن تقدر تحاول تضحك على نفسك وتعيش جو انك تحب هذا القطاع!
ياللهول، للحين ما جانا شي! العمل؟ يمكن لقمت معاك شركة من الشركات في الشهر الأول او الثاني وباقي شوي على خطوات التوظيف لكن ما في شي مضمون! لازم نضمن شي باليد.
الشهر 5 مرحلة التنازل الشركة: الهدف الحصول على وظيفة بدوام كامل في مدينة قريبة بمجال قريب من التخصص لدى أي شركة بأي قطاع!
الحين عاد تنازلت عن أغلب العوامل المهمة، ما صار يفرق معاك المدينة او الشركة او حتى القطاع لكن على الاقل تكون الوظيفة قريبة من التخصص، يعني لا يكون تخصصي تسويق واشتغل خدمة عملاء. لازم ابحث عن الفرص الي بشكل أو بأخر أقدر أربطها بالتخصص حقي… القائمة راح تزود وهذا المطلوب.
اذا للحين ما جاك ولا عرض وظيفي، لازم تحط ببالك أنك ما تبي تكون عاطل لمدة طويلة ويؤخذ عنك فكرة بأنك متكاسل، في هالمرحلة لازم تاخذ إجراء وتحاول تحصل أي فرصة!
الشهر 6 المرحلة الحرجة: الحصول على وظيفة بدوام كامل في أي مدينة بأي تخصص لدى أي شركة في اي قطاع!
واتمنى ان الجميع يوصل لأهدافه بأسرع وقت ممكن، لكن الحياة مو وردية والواقع قد يكون مؤلم، لذلك وجب الاستعداد، امشي على هالخطة راح تكسب:
1- التركيز في التقديم بناء على المرحلة
2- وضع خطة مدروسة وقائمة بالشركات المستهدفة حسب المرحلة
3- تحديد الاولويات وتحقيق اكبر قدر من المكاسب
للأسف بعد التخرج الكثير يحب ياخذ فترة “نقاهة” بعد كرف الجامعة وهذا من حقك لكن خلي في بالك نقطة مهمة ان البحث عن وظيفة ياخذ وقت وبعض الشركات الاجراءات التابعة الين يتم توظيفك ياخذ ما بين 3 – 6 شهور، لذلك ممكن يطول الموضوع معاك وما في شي مضمون في يدك.
في تغريدة سابقة فصلت فئات المتقدمين والمرشحين على الوظائف من وجهة نظر الشركة او المدير المستقبلي حسب نظرتي الشخصية، اليوم راح أتكلم عن الخطة الي المفترض تكون عند الباحث عن العمل أول ما يتخرج من الجامعة، خصوصا في أول 6 شهور بعد التخرج، من ناحية وضع الأهداف عند البحث عن فرصة pic.twitter.com/uzxwVUl0tN
— خالد عدنان جوهرجي (@KhalidJoharji) August 12, 2018